EUSKAL OKELA, proiektu transmedia

Edukia

El Cosmonauta proiektuaren ildotik jarri dute abian Euskal Okela izeneko lehen euskal zonbien inguruko filma. South Park edo Family Guyen gisako istorioak jorratu nahi dituzte, zonbiak protagonistatzat hartuz postaletako Euskal Herri ederra desitxuratzeko. Oro har, 80.hamarkadako komedia izango omen dute oinarritzat.

Generoa
Fikzioa. Beldur eta komedia generoen arteko uztarketa.

Multimediatasuna
Proiektuaren hasieratik amaiera arte sarearekin lotuta egongo den proiektua izango da. Internet eta Sare Sozialak dira haien abiapuntu nagusienak. Facebookeko orri baten bidez eman dute proiektua ezagutzera, bertatik promozionatzen dira eta bertan eratu dute parte-hartzaileen sarea. Bertan partekatzen dira ideiak, istorio berriak etab. Jada 2035 lagunek “atsegin dute” proiektua sare sozial honen baitan.

Interaktibitatea
Interneten bidez batzen diren 800 pertsonak lanean dihardute aktiboki proiektu honetan. Modu horretan, protagonistak, pertsonaiak eta filmaren argumentu edo istorioak jenderen ideia ezberdinak uztartuz egonkortu dira. Horrez gain, jendearen parte-hartze eta laguntza eskatu da pelikulako soinu banda eta musika osatzeko, hala nola bideojoko, merchandising diseinu, kartel, komiki edota obra literarioak sortzeko.  Gainera proiektuarekin bat egiten duen orori horren inguruko kontzertu edo jardunaldiak antolatzera animatzen dute.

Gainera, Crowdsourcing izeneko kolaborazio modua ere sustatzen dute. Hau da, ikus-entzunezkoen munduan jarduten duten profesional zein ikasleei gonbidapena luzatzen diete haiekin kolabora dezaten, ikasleei praktika gisa eta profesionalei haien enpresa edo jarduera ezagutarazteko modu egokia izan daitekeela argudiatuz.

Finantziazioa

Aurrekontu gutxiko filma egin nahi dute, instituzioen laguntza ekonomiko eta horrekin lotuta datorren haien kontroletik at. Finean, herritik eta herriarentzat egindako proiektu batean sinesten dute, hori dela eta, teknologia berriek eta internetek eskaintzen dituzten baliabideak erabiliz sortutako proiektua dute helburu.

Horretarako, inbertsio pribatua eta Crowdfunding deritzon finantzaketa era jarriko dute martxan. Beraz, norbanakoek egindako ekarpen edo dohaintzei esker finantzatuko da filma, norbanako horiek produktore izendatuz (filmaren kredituetan azalduko dira) eta horrez gain, aurrerago aditzera emango dituzten zenbait abantaila eskainiko zaizkie kolaboratzaile horiei.

Iraupena
2011ko martxoaren 16an sortu zen Facebooken proiektua, baina ez dakite zehazki zenbateko iraupena izango duen. Izan ere, data batzuk lotu edo aurreikustea ez da lan erraza, jendearen parte-hartzea, aurrekontua, istorioaren eraketa... beste faktore askoren artean proiektu guztia balidintzatzen duelako.  Horrez gain proiektuak ikusle,kolaboratzaile edo jarraitzaileek nahi adina denbora iraungo du, haien baitan baitago proiektuari eman nahi dioten izaera. Hotsa, film batean utzi nahi duten soilik, edo pelikulatik haratago proiektu zabalago batean moldatu nahi duten.

Jatorria eta Hizkuntza 
Euskal Herriko jatorria duen proiektu honen eraketa gazteleraz gauzatzen ari da, hori dela eta, suposatzen da hizkuntza horretan ekoiztuko dela filma, baina antolatzaileek oraingoz ez dute aditzera eman faktore hori.

Egileak/Sustatzaileak

Ez dago argi nor izan den proiektuaren sustatzaile edo sortzailea, baina gutxinaka geroz eta egile, jarraitzaile edo ekoizle gehiago biltzen ditu proiektuak. Gainera, Baleuko produktora edota HRP makillaje eta karakterizazio enpresa Euskal Okela proiektuan interesa agertu dute eta jada hasi dira kolaboratzen, eta euren jakintza eta baliabideak eskaini dizkiete.

Hitza egunkaria: informazioa, euskara eta gertutasuna

Ondorengo iruzkinean, Hitza.info hedabidearen analisi sozio-pragmatikoa landuko da, ikuspegi soziolinguistikoa, funtzionala, eta estiloa kontutan hartuz, ondorio batzuk azaleratzeko.

Hasteko,  kontutan hartu behar da, Hitza eskualdeka funtzionatzen duen egunkari euskalduna dela. Hori da bere oinarri eta indargune nagusia. Izan ere, euskara hutsean argitaratzeaz gain, maiztasun handiko jarioa du eta gertutasuna eskaintzen die hartzaileei biltzen dituen gai eta gertakariei dagokienez.

Hori dela medio, euskararen mesede eta sustapenerako lan egiten duela esan daiteke, eta horretarako, euskara batua erabiltzen du. Hala ere, eskualde bakoitzean bertako euskalkiko hitz gutxi batzuk txertatzen dira. Gure aburuz interesgarria litzateke banaketa edo hedapena lurraldeka egiten denez gero, euskalkiei indar gehiago ematea, dudarik gabe Hitza bezalako proiektu batek horretarako aukera ematen duelako.

Oro har, interes sozialeko gai eta albisteak jorratzen ditu Hitzak. Beraz, informaziozko komunikazio eredua lantzen dutela esan daiteke.

Hedabide honen kasuan, nabaria da euskarri fisikoari lehentasuna ematen diotela, ziber-hedabidea bigarren maila batean utziz. Finean, Hitza.info webgunean multimediatasuna eta hipertestua ez da gehiegi lantzen ( bideo, argazki, audio… gutxi agertzen dira eta hiperestekarik ere ez da apenas erabiltzen). Gure ustez gaur egun Interneta hartzen ari den indarra kontuan izanik, sareko bertsioa gehiago sustatu behar litzateke, sare sozialak eta Internetak eskaintzen dituen baliabideak aprobetxatuz.

Jakina da, baliabide ekonomiko urriak  direla medio,  ez dela erraza komunikazio eredu dinamiko bat sortzea, multimediatasun eta digitaltasunari dagokionez.  Hala  ere, haien indar guztiak jartzen ari dira ahal duten neurrian hori sustatzen. Besteak beste, albiste bakoitzaren ostean iruzkinak egiteko tartea eskaintzen du webguneak, eta hori oso interesgarria da irakurleek haien iritzia emateko aukera izan dezaten; eta haien arteko elkarrizketa ahalbidetzen duelako.

Orokorrean, Hitza egunkariak eredu tradizionala lantzen du, hala ere, hartzaile zabalago batengana iristeko estrategia gisa (batez ere txikienengana)  zorion agurretarako atala txertatzen da kontra-portadan eta baita eskualdekako webguneetan ere.
 

Proposamen gisa, ez legoke gaizki, Hitza.info atari nagusiak eskualdekako albiste garrantzitsu edo interesgarrienak bilduko balitu, horrela, irakurle orok, lehen begirada batean euskal eremu zabalean gertatutakoen berri jakingo luke, eta berea ez den eskualde batean jazotako berriren batean interesa izanez gero, gertuko informazioa jaso ahal izango luke berehala, gainera, tokian bertako euskalkiaz bustita. Horrek, euskarari mesede egingo liokeela uste dugu, euskalki ezberdinetako hitz, esamolde eta estrukturak barneratzeko bidea izan daitekeelako. Finean, irakurleen euskara aberastu edo elikatzeko modu bat izan liteke, elkartrukearen bidez, eskualdez gaindiko lotura sustatzea.

Azkenik, irakurle edo erabiltzaileek beraiek kudeatutako agenda indartsu bat eskuragarri jartzea interesgarria litzateke, estrategia moduan. Horrela, erabiltzaile orok bere eskualdean edo besteren batean egongo diren ekintza ezberdinak txertatuko lituzke agenda edo egutegiko atalean denontzat eskuragarri. 

Iturriak:

- Hitza.info

- Multimedia testuen estrategia linguistikoak: Hitzaren azterketa  

Ez nau beldurtzen negu hurbilak...

Haizea, euria, elurra, hotza, izotza...

Negua lo gelditu zaigu oinetan.

Gabonak, sutondoa, berotasuna, goxotasuna...

Izpi lasaigarri bat, negua joan da ta!

Urtarorik hotzenaren inguruko muntaketa esperimentala da honakoa; 

soinu elementu, hitz eta abesti zati ezberdinen arteko nahasketaren emaitza xumea.